Images

مكعباتنا : 1-البداية : خطوات دراسة الموقف


1-البداية : خطوات دراسة الموقف 


لما بدأت أهتم بتنمية المهارات 

مكنتش اعرف لسه حاجه عن التعليم المنزلي خالص 

كانت لعب ريتال اللي عندي في البيت كلها هادفة

 لكن مش ممنهجه ومخططه 

وانا اصلا مش من النوع اللي بتحب تجيب حاجات تافهه

ومنظرة وخلاص 

بيتي اصلا مفيهوش حاجه للمنظرة 



الموضوع ابسط من اني افكر في حد هييجي يشوف حاجه عندي 

باحب اعيش الحياه اللي تريحني انا مش اللي تعجب الناس 

ففي افكار بيبقا مسلم بيها عند الناس وهي عندي مرفوضه تماما 

زي فكرة النيش مثلا والحاجات اللطيفة الكتيره اللي بتيجي في 

الجواز وملهاش لزمه من وجهة نظري

فانا تفكيري مختلف من زمان 

مش ماشيه مع الهوجه اللي بتمشي فأي حاجه 

وبحب اخد اي حاجه بعين النقد 

مش باخد مسلمات غير القرءان والسنه 

بعد كده اي حاجه بالنسبالي مفيهاش مسلمات أبدا 


لذلك نصيحتي لكل أم 

شوفي انتي اصلا تنفعي تكوني أم تعلم منزلي والا لأ 

اصل الموضوع مش مقياس 

الأم الحلوة بتعلم منزلي والأم الوحشه مبتعلمش منزلي ؟!

لا طبعا اطلاقا 

ربنا خلق الناس مختلفه في الأشكال والألوان وكمان الأذوق 


وكمان قدرات على التحمل 

ففي أم وجود الطفل معاها في البيت كارثة ومستنيه اليوم اللي 

يروح فيه المدرسه عشان تشم نفسها شوية 

فمحدش يقنعني ان الأم دي ممكن تعلم طفلها منزلي :D 


هي طاقتها متتحملش ده خالص 

وفي ام شايفه المدارس دي كارثة وعيوبها اكتر من مميزاتها 

ومجرد انها تشوف طفلها بيلعب قدامها دي فحد ذاتها متعه 

وبتعرف تكيف نفسها مع وجوده وبتعرف تتفاهم معاه وهو بيكون 

بيشتغل في حاجه وهي قاعده تشتغل او ماسكه كتاب وبتعرف 

تتأقلم أو بتعرف توفق بين شغلها وبيتها 

ودي هي النوع اللي هيقدر يكمل وياخد القرار 

فبداية خالص لما تيجي تفكري تعليم منزلي والا تعليم مدرسي 


هاتي ورقه وقلم 

شدي سطر كده في النص 

اكتبي على اليمين مميزات المدارس

وعلى الشمال عيوب المدارس 

وبعد ما تخلصي كتابه 

سيبي القلم 

بصي للورقة 

اقرأي اللي كتبتيه

وشوفي انتي شايفه الدنيا عامله ازاي 

الناس اللي مش متعودة انها تكتب هتاخد وقت في البدايه 
وهتمسك القلم وتقعد تفكر 
وهتقول انا مش بتاعة المقارنات والكلام ده 

صدقيني اكتبي 

امسكي ورقة وقلم وابدأي هتلاقي نفسك بتعدي ويتذكري حاجات تايهه منك 

وهتلاقي نفسك في الأخى وصلتي لرأي 

هل المدارس بالنسبالك حلوة والا وحشة ؟ 

ودي اهم نقطة عشان تاخدي قرار فأي حاجه 

انك تشوفي نفسك بتبصي للحاجه دي ازاي 

هل انتي بتحبي تبصي بره الصندوق وتغيري ؟

والا بتحبي تمشي في النمط المعتاد ومرتاحه كده ؟

ولو عاوزه تعرفي انا مع المدارس والا ضدها شوفي البوست ده : 
اضغط هنا


يمكنك متابعة باقي سلسلة مكعباتنا من خلال الرابط التالي : اضغط هنا


#التعليم_المنزلي
#مكعبات
#مكعباتنا

0 التعليقات: