Images

المرأة وجلد الذات !!



من أكتر الأمور التي تبرع فيها المرأة المصرية : جلد الذات  
تقعد تحاسب نفسها ازاي يجيلها قلب تخرج مثلا مرة وتسيب ولادها مع جوزها وطول الخروجه نكد بقا
= طب بتخرجي ليه خليكي قاعدة مغمومه احسن :P


لو العيال نامت وقامت عملت لنفسها حاجه تاكلها يصعب عليها تاكلها وهما نايمين وتقولك لا انا هاستنا لما يصحو او هاقوم اصحيهم ياكلو معايا
 = اتهدي واقعدي واستمتعي شويه قبل مايصحو هو انتي غاويه وجع قلب ؟ 

جوزها يخرج مع اصحابه ويرجع مبسوط ودي تقعدله زي الشاويش عطيه ورا الباب لما يرجع بقا ازاي يجيله قلب ينبسط منغيرنا؟ 
= عادي على فكره من حق كل واحد مساحة حرية شخصية خاصه بيه بس انتي اللي مفرطه فحقك يا فالحه 

كل شويه تنزل تشتري هدوم للعيال وهي مجابتش هدوم من كام سنه وتقولك انا مش مهم المهم العيال 
= لا على فكره انتي مهمه ومن حقك تكوني مبسوطه ومش هيحصل حاجه لو جبتي مره ليكي ومره للعيال

مواقف كتير جدا بتعملها الست المصريه من وجهة نظرها هي انكار للذات وانها كده أم عظيمه ومضحيه عشان بيتها وولادها 
لكن في الوقع بعد فتره بتبدأ تشوف الحقيقه بعد ما تكون خسرت سنين حلوه اوي من عمرها 

انها كان ممكن توفق بين سعادتها الشخصيه وسعادة ولادها وبيتها وجوزها 

كان ممكن تصحا يوم متجريش على المواعين والمطبخ وتعمل حاجه مختلفه في اليوم ده هي بتحبها وتدي نفسها اجازه وتشعر بكينونتها اللي بتنقرض كل يوم بعد ما بيشرف اول طفل وممكن تكتفي بكام بيضه مسلوقه الولاد ياكلوهم مع خيار وطماطم وخلص الموضوع 

بعد فتره من العيشة اللي متخيله نفسها فيها مضحيه بتلاقي ولادها بيكبرو وبيستغنوا عنها وبيبصولها على انها مش أد تفكيره - لأنها بطلت من زمان تطور من شخصيتها -
وبتكتشف ان الفجوه بينها وبين جوزها كبرت اوي واقتصر دورها في البيت على الغسيل والكنس والمسح الخ الخ ومبقاش فيه نقطة تلاقي ولا نقاش بينها وبين جوزها لأن هو بقا مستوى تاني عقليا وفكريا وهي وقفت مكانها من زمااااااااااااااان 

الخلاصه : بطلي تلعبي دور البطوله وتضحي بكل حاجه وانتي مش مطلوب منك ده أصلااااااا

دينك دين الوسطية مطلبش منك أبدا تهملي نفسك ولا حد يجور عليكي واداكي كل حقوقك وانتي اللي بتفرطي فيها
من حقك تحطي خطه لتنمية نفسك ومتتلككيش مبقاش في حاجه مستحيلة دلوقتي كله اون لاين وانتي قاعده فبيتك ده لو مش قادره تخرجي 

البطوله الحقيقية انك تتحدي ظروفك وتوازني بين امورك وتنمي كل جزء في بيتك بالتوازي مع نفسك مش تبقي انتي شهيدة القصة اللي محدش هيسمعها في الآخر اصلا لان كل واحد هيبقا مشغول في حياته 

اوعي تهملي نفسك انتي جزء مهم جدا في تطور البيت ده ولو انتي مبقيتيش على المستوى المطلوب كله في النهايه هيقولك شكرا وهيدور على غيرك يتناقش معاه ويشبع عنده الحاجات الفكريه والثقافيه 

بطلي جلد في ذاتك ومتخافيش من نظرة حد ليكي ولا حتي جوزك 

التغيير في الأول هيبقا صعب شويه لكن كله هيتعود 
بلاش خناق مع جوزك وتقعدي تقوليله ده حقي ومش حقي وانتو هتموتوني بالحيا والكلام اللي بيهد ميبنيش ده 
اقعدوا اتفاهمو سوا وصدقيني هيحترمك اكتر وهتكبري فعينه لأن الراجل بيحب الست اللي ليها رأي وكيان طالما لا تنازعه في قوامته ;)  يعني العبيها بذكاء خدي حقك بس متقفيش قدامه زي الديك الشركسي :D 

الحياة على أد ماهي صعبه فهي سهله جدا لو بصيتي ليها بمنظور مختلف 

حطي نفسك جوا الإطار وانتي بتبصي لبيتك حبيبتي لأنك انتي الإطار نفسه <3 nbsp="">

#بطلي_تضحيات_وهمية
#نمي_نفسك_وبيتك_سوا
#خليكي_متطورة_مش_قاغدة_وثابته_مكانك
#من_حقك_تطوري_من_نفسك
#متخلقناش_لوقفة_المطبخ_طول_اليوم
#مش_لازم_كل_يوم_طبيخ
#البيت_مش_هيفضل_نضيف_علطول
#ادي_لنفسك_أجازة
#تستحقي_تعيشي_سعيدة
#مكعبات

رابط البوست : اضغط هنا

0 التعليقات: