Images

الضرب ثم الضرب ثم الضرب










مية رسالة وسؤال عن ضرب الأطفال :( 
وعاوزين مني اجابه على ايه بالظبط ؟ 
جايين عاوزيني اتعصب عليكم والا اضربكم ؟ 
لانكم بجد تستحقوا الضرب 
ازاي تسمحي لنفسك تستقوي على كائن ضعيف وانتي المفروض تكوني الحما والأمان ليه ؟ 
بطلي تقولي باربيه 
ضرب ايه ده اللي بيربي ان شاء الله 
يعني حضرتك المفروض لما تيجي تسأليني عن حاجه اضربك عشان تفهمي مثلا 
واقولك اصلك مش هتفهمي غير بالضرب !!!!!!!!!!!
يعني ايه تمدي ايدك على طفل وتلطشيه بالقلم ؟ 
يعني ايه تلسوعيه على ايده والا رجله ؟
ويعني ايه تلطشي فيه وتقولي بعلمه وبربيه ؟ 
اقولك حاجه واحطلك الصراحه فوشك 
انتي أم فاشله وبتداري فشلك بضرب الطفل 
يالا اشتمي فيا بقا وطلعي الكبت اللي جواكي 
ايوه هاقولهالك تاني 
انتي فاشله فاشله فاشله 
ام مش عارفه تتفاهم مع كائن ضعيف مش عارف حاجه في الدنيا ومحتاج يعرف منك 
ام مش عارفه تهدي نفسها وتسيطر على اعصابها وتاخد طفلها في حضنها تطمنه وتقوله انا جنبك بدل ما تمد ايدها عليه وتطلع عجزها وفشلها عليه 
وانتي بتضربيه كده بصي في عينه البريئه الجميله الرقيقه الملاك دي 
بصي لكائن ضعيف وصغنون المفروض انتي أمانه وحنانه وكل حاجه ليه في الدنيا 
وفجأه بتتحولي لوحش كاسر يضرب ويصوت ويزعق :( 
ايه بقا 
يروح فين الطفل ده يلاقي أمان لو مش هيلاقيه في حضنك 
يا شيخه بلاها خلفه وبلاها عيال مدام جايبين عيال تطلعو عقدكم عليهم 
كل ضربه ضربتيهاله هتسيب اثر جوه نفسه وهيكبر بيه 
وهيطلع انسان معقد ومليان كلاكيع 
وترجعي تشتكي في الآخر ده مغلبني ده مبيسمعش الكلام ده ابن عاق 
محدش يتكلم عن عقوق الابناء غير لما يشوف الأم والأب دول كانو عاقين بولادهم الأول ولا لأ 
قبل ما هو يتحاسب على عقوقه انتي هتتحاسبي على عقوقك 
اضربيه روحي طلعي غلك فيه 
وتعالي عيطي وقولي بيضرب اصحابه في المدرسه 
امال يعني هيبوسهم !!!
ماهو لو كان لقي اللي تبوسه كان تفهمه كان حب اصحابه :( 
اضربيه وتعالي قولي بيسرق 
اضربيه وتعالي قولي بيزعق ويخبط دماغه فحيط 
اضربيه وطلعي فشلك وكبتك عليه 
انا كل اما افتح الرسايل واجاوب واشوف كمية الرسايل اللي جايالي على الضرب اقعد اعيط 
حرام عليكو ارحموهم 
ترضوا حد يضربكو ويمد ايده عليكم ؟؟؟؟؟؟؟؟؟؟؟؟
طب خلي جوزك يفكر يضربك كده والا يمد ايده عليكي 
وشوفي هتعملي فيه ايه 
ان ما ندمتيه على اليوم اللي اتولد فيه ابقا مبفهمش حاجه 
واللي مكسورة وجوزها بيضربها ومش قادره تتكلم بصي جواكي شوفي مجروحه منه ازاي وحاسه بإهانه اد ايه ؟ 
اشمعنا بقا بتضربي ابنك وعاوزاه يسكت !!!!!!!
الراجل اللي بيضرب مراته في نظرك مش راجل اصلا 
والأم اللي بتضرب ابنها دي مش أم برضه أصلا
حرام بقا دول ضعفا وأبرياء 
مش قادرين تاخدوهم في حضنكم  بتخلفوهم ليه 
ذنبهم ايه في ضغوطكم وتعبكم ؟؟؟ ذنبهم ايه ؟ 
روحوا اتأسفوا لعيالكو 
واطلبو منهم يسامحوكو 
واوعدوهم متمدوش ايدكم عليهم 
يمكن تقدرو تمسحوا الجريمه اللي ارتكبتوها في حقهم :( 

وجعك الكلام ده اوي ؟ 
معلش خدي الحل بقا : اضغط هنا
#قلبي_وجعني 
#دي_مش_امومة
#ماما_بقت_وحش_مش_أم_أبدا
#بتخلفوهم_ليه ؟
#مكعبات

رابط الموضوع على الفيس بوك : اضغط هنا

0 التعليقات: