Images

التعليم المنزلي .. أسئلة جهزي إجابتها قبل أن تأخذي القرار




التعليم المنزلي !!

كلمة أصبحت تُحَيِر الكثير من الامهات في وقتنا الحالي 

هل هي واضحة المعنى أم تحتاج الى توضيح وتفسير ؟ 

أشارككم وجهة نظري عن هذه الكلمة عن طريق أسئلة جاوبي نفسك عليها

وستدركين المعنى بعد ان تكتبي اجاباتك وتقرأيها على نفسك بمنتهى الصراحه 

بعد أن أشارككم هذا الموضوع الذي ناقشناه على صفحتي الشخصيه

على الفيس بوك بعد تسجيل فيديو مع وكالة الاسوشيتد برس

حول التعليم المنزلي في مصر 

واليكم الموضوع : 


ولأن اللغط كتر حوالين الفيديو اللي سجلناه انا وصديقتي مروة الحبشي 

والأستاذه مروة رخا مع وكالة ( أسوشيتد برس) 

عن التعليم المنزلي

لأن الأسئلة بقت تضيع وقت كتير ومتكررة

والناس حابة تفهم على أساس ايه هنعلم منزلي والا مش هنعلم ؟


حان وقت توضيح الموقف ..



الناس اللي متعرفش الفيديو يمكنكم مشاهدته 

اذا لم يعمل الفيديو اضغط هنا



وده شرح من قناة العالم للموضوع 

اذا لم يعمل الفيديو اضغط هنا




وانا هنا هاتكلم عن موقفي انا فقط لانه لا يحق ليا اتكلم بلسان شخص آخر 

وللعلم البوست طويل عشان متتصدموش لكن بحاول اجمع فيه أغلب الأجابات

عن الأسئله اللي بتجيلي اختصارا للوقت

مج نسكافيه او كباية شاي كده واقعدي مزمزي في البوست لو الموضوع يهمك 

احنا سجلنا في اجتماع أمهات الجيزه بدون علم مسبق من المجموعة


بمعني اننا رحنا يوم الاجتماع انا والأستاذه نهي الحناوي

ودخلت على الأمهات وقلتلهم احنا هنصور النهارده تقرير عن اجتماعنا بعد إذنكم 

واللي مش عاوزه تظهر في التسجيل براحتها وكل الأمهات وافقت على التصوير 



منبثق أصلا عن مجموعة التعليم المرن

 للناس اللي متعرفش فكرة الجروبات دي منين 

يعني مفيش حد كان يعرف ان في تصوير من قبلها اللهم الا أسماء 

أدمن جروب المجموعة وصديقة  أخرى مقربه ليا فقط

وكان رأي أسماء اننا لازم نقول للأمهات قبلها

وانا قلتلها لأ مش هنقولهم حاجه وهما هيسامحوني

 لأن انا عاوزه الوضع يكون طبيعي جدا

مش عاوزه أي تكلف او تحضير مسبق انا عاوزة الصورة تعبر عما يحدث حقيقة 


صورنا اللقاء كله كان حوالي ساعتين


وبعدين اتنقلنا انا ونهى على بيتي وصورنا ساعتين كمان

وطبعا واضح من الفيديو ان الموقف كان طبيعي برضه

لأني حتى الخامات اللي جبتها ولسه مخرجتهاش من كراتينها

كانت مركونه في ركن في الاوضه

 وحبيت إني اخلي الوضع 100% طبيعي


واتكلمنا عن أغلب النقاط اللي بتتعلق بالتعليم المنزلي من مزايا وعيوب

 وأحوال المدارس حاليا وأفكارنا وأنواع التعليم المنزلي

واحتياجاتنا من الحكومه... الخ 

يعني كل ما يتعلق تقريبا بالموضوع


لكن الوكاله قررت تعمل التقرير 5 دقايق فقط ولذلك تم اختصاره 


وموضحش الفكره كلها بكامل جوانبها


ولذلك انا اعتبرته كإعلان فقط ان في أمهات مهتمه بالتعليم المنزلي في مصر

 وليس تقرير مفصل عن احوالنا

طيب انا شخصيا هاعلم بنتي تعليم منزلي كامل او موازي او تكميلي أو ... أو .. أو ؟


لم أقرر ذلك أنا ووالدها حتى الآن فما زلنا في طور الاختبارات لقدراتنا وقدرات منزلنا وطفلتنا


يعني ايه ؟

يعني مفيش حاجه اسمها قعدت انا وجوزي فقعده وقررنا نعلم ريتال تعليم منزلي

ده اسمه تعليم البنتجان مش تعليم منزلي 
grin emoticon
ليه بقا ؟

لأن القرار مش سهل ومش وقتي ومينفعش يكون قرار مرحلي 


بمعنى لازم ندرس كل جواااااااانب الموضوع


طب حضرتك ايه هي جوانب الموضوع بقا اللي عاوزه تدرسيها ؟

هاقولك يا ستي : 


هل انا هاعلمها منزليا عشان أوفر فلوس تعليمها والا عشان أحسن مستوى التعليك وطريقته ؟


هل هاعلمها منزلي لحد مرحله معينه والا لحد آخر مرحله ؟

هل أنا كأم عندي مقدره تدريسيه أصلا واقدر استحمل تواجد بنتي معايا كل الفتره 
دي وعندي طولة بال والا هاعلم بطريقة سمك لبن تمر هندي ؟

هل هيشترك معي زوجي ووقته يسمح له بالمساهمه في تعليم بنته والا انا هاشيل 
الليله لوحدي ؟

طب هل لو مش هيشترك هاقدر اشيلها لوحدي والا هاقع في نص الطريق

 وهاقدر اجيب مدرسين في المواد اللي مش هاعرف ادرسها

والا صديقه هتدرسها والا مجموعه والا ايه ؟

طب هل في صديقة مقربة مثلا ليها نفس الاهتمام وهنقدر نشجع بعض

 والا هلاقي نفسي لوحدي خالص ؟

طب هل انا من النوع اللي يقدر يكمل لوحده

 والا من النوع اللي لازم حد يبقا معاه يشجعو بعض؟

طيب بعد تكوين المجموعات اللي شغاله دلوقتي مبدئيا بتحاول تنظم نفسها

هل هاقدر اشتغل معاهم والا هاشتغل مع نفسي والا هوازن بين الاتنين وادمج ؟



طيب هل أنا مستعده ثقافيا وتربويا للدور ده وهل أهلت نفسي ليه

 والأ هامشي بنظام عُك وربك يفُك ؟



هل انا أم منظمة وأقدر أنظم وقتي ووقت بنتي والا هنصحا فأي وقت فأي معاد 

ونذاكر أي ماده وتلاقي الدينا في البيت مدربكة وزي ما تيجي تيجي وخلاص ؟



طيب هل هاقدر اتنازل عن عملي واشتغل فقط مع بنتي 

والا انا محتاجه يكون ليا عمل وهاوفق بين الاتنين والا مش هاقدر خالص ؟


هل هينفع يكون في ميزانية مخصصه (مش مهم كبيره والا صغيره ) لتعليم البنت 

والا كل شهر على حسب الحال بقا

 وهانمشي بنظام طالع نازل وربك هيدبرها من عنده ؟

يعني تقصدي ان التعليم المنزلي مكلف ؟

لا ما اقصدش كده حضرتك اللي اقصده انك مثلا هيكون للبنت معدل 1 جنيه في 

الشهر مصاريف تعليمها وفي السنه 12 جنيه هانقدر نركن المبلغ

 على جنب فحساب للبنت مثلا ونسحب منه حسب احتياجات تعليمها

والا هيدخل في مصروف البيت وكله فبعضه وهيا ونصيبها كل شهر ؟


وهل هاقدر اعوض الجانب الاجتماعي للبنت برحلات ميدانية ومجتمعية

ومع المجموعات الأخرى والا هارزعها في البيت واجيبلها اكتئاب وانطواء

 وابقا طينت الدنيا خالص وعلى كده المدرسة أرحم مني ؟

هل هاقدر اختار منهج امشي عليه والا هاستعين باستشاري تربوي

 والا بمنهج المدارس بس هاعلمه بطريقة أفضل والا هاختار منهج اون لاين

والا كل اما واحده تنزل منهج على النت وتقول انا هاعلمه لبنتي هاضايق بقا 

واجري عليه واقلب المنهج اللى كان معايا واقلب حياة البنت معاه ؟

يعني هو لازم استشاري تربوي ومصاريف اد كده ؟

لا مش لازم يكون معاكي خطوه بخطوه لكن على الأقل في البدايه تستشيريه

 وبعد كده كل مرحله تقيسي انتي ماشيه صح والا غلط

 والا حضرتك فجأه بقيتي خبيره تربوية ؟


انا مثلا مخرجة صحفية وخبرتي المهنيه في الإخراج

 فجأة كده هاقلب وابقا مدرسة وتربوية بدون أي تأهيل ؟

والا أعد نفسي للمهمه الشاقه دي أو الممتعة وده على حسب شخصية كل واحد

لان مش كل الناس تنفع إعلاميين ومش كل الناس تنفع مهندسين

 ولا دكاترة ولا مترجمين ولا برضه مدرسين وهكذا


وهو ده فايدة التدعيم سواء جهود تطوعيه زي جروبات التعليم المرن

والمتطوعين بها والمشاركين أو من مؤسسات

 زي مثلا ابن خلدون للتعليم المنزلي واللي بنحاول نعمله فيها

وزي الاستشاريين اللي بنحاول نستعين بيهم كأمهات بشكل تدعيم خاص لينا

زي دكتور كيميت ودكتور هالة صالح مثلا وده على سبيل المثال وليس الحصر

لأن مفيش تدعيم حكومي

فبنحاول ندعم نفسنا تدعيم خاص لحد ما ربنا يفرجها من عنده

emoticon


طيب انا بقا قدراتي ومؤهلاتي إيه ؟
 وهل تعليم بنتي في البيت هيبقا أفضل والا في المدرسة أفضل ؟

هل انا عارفه نمط طفلي التعليمي وقدراته
والا هادوس فأي منهج بدون ما اعرف هو ذكائه ونمط شخصيته من أي نوع ؟

هل هاقدر بشجاعة وثقه بالنفس أواجه المجتمع اللي مش هيتقبل الفكرة بسهولة

 والا كل أما حد من عيلتي أو أصحابي يقولي كلمتين هيجيلي احباط

 واقعد فناحية اعيط واقول هما مش فاهمني ليييييييه ؟

انا خلاص مش قادره استحمل وتعبت من الدنيا دي !! 
unsure emoticon


هل عملت مثلا فترة اختبار ليا ولبنتي وعلى أساسها حطيت نتائج واقتراحات وخطط مستقبليه ؟

 والا انا هاعلم منزلي وخلاص بس ازاي معرفش

 واروح اقول لكل الناس عرفوني انتو الله يخليكو بقا وفهموني
 عشان الفكره عاجباني وانا مش فاهمه
 بدون ما أدور وابحث الأول يعني ايه تعليم منزلي؟

مش معناها اني ما اسألش لا طبعا اسألي لكن دروي وابحثي أولا
وعلى الأقل لازم يكون عندك تصور للموضوع هيكون ازاي
 مش مجرد كلمه عجبتك او انك متضايقه من المدارس فهتعلمي منزلي بقا هه
ماليش دعوه اشمعنا هما ..

اوعي تكوني متخيله انك مخنوقه من المدرسه فهتريجي دماغك وتعلمي منزلي ؟

دي تبقا كارثه لو انتي فاهماها كده 
لانك مش هتريجي دماغك خالص
انتي هتبدأي تشغلي دماغك حضرتك ودماغ طفلك 



هل عندي خطه اني لو مت او مرضت او حصل أي ظرف طارئ
 مين هيكمل مع البنت او هيكون الموضوع ماشي ازاي
والا اي ظرف هيحصل الدنيا هتقف والبنت حياتها هتتلخبط ؟


هل لو قررنا نتنقل لمكان سكني اخر او نسافر مثلا
 عندي تصور وخطه واضحه حركة التنقلات دي هنقضي المدة بتاعتها ازاي
في تعليم البنت والا اصبري بقا انا ننقل ونقعد وأمورنا تستقر
 واركني على جنب شويه ؟


هل هاوديها مكان بيعلم تعليم شبه المنزلي من حيث الفكره
واعرف ايه عن الاماكن دي ورحت شفتها ودرستها وفهمت كل حاجه فيها
والا هاعلمها في البيت والا موازي أو تكميلي
والا أموتها وارتاح واخلص من الصداع ده !!
pacman emoticon


اجابات واضحه وصريحه ومباشره للأسئله من نوع : 


- ليه عاوزه اعلميها منزلي (الاسباب واكتبها واحطها قدامي كل شويه عشان أفتكر هدفي )

- الهدف السنوي ايه والهدف الشهري ايه والهدف الأسبوعي ايه واحطهم قدامي واقيس مستوى تقدمي وتحقيقي ليهم وهكذا



طيب انا أم كويسه وهاتعلم وهأهل نفسي
بس عاوزه اعرف هاحتاج فتره اد ايه للتأهيل
 وهاحتاج فتره اد ايه لاختبار قدرتي وقدرة طفلي قبل ما اخد القرار ؟

هتحتاجي فتره أد ايه للتأهيل : هتحتاجي عمرك كله لحد آخر لحظه 
kiki emoticon

لكن في مرحلة عندها تقدري تشعري انك فعلا مؤهله تبدأي

هتلاقي أصبح عند ثقه اكتر وتصور أفضل

 وتعامل افضل مع طفلك واجابات لاسئله كتير كانت محيراكي


هيا المرحله دي بقا اللي تقدري تبدأي تدرسي وتاخدي قرار

 بس مش أنا اللى أقولك هتكون امتا... اسألي خبير تربوي



هتحتاجي فترة اد ايه لاختبار قدرتك على تحقيق الهدف ؟ 

لما توصلي لمرحلة انك تحطي لنفسك اهداف على مدار فتره زمنيه

وتحققيها بنسبة 90% وقتها هتكوني مؤهله تطوري نفسك

 وتقدري تزودي النسبه دي على حسب قدراتك وعزيمتك


اقولك سر : انا شخصيا هاخد فتره سنتين كاملين اختبارات ودراسة ونتائج
 عشان أوصل لقرار..

اه والله أصله مستقبل بنتي مش لعبه اول ما ازهق هاقول مش لاعبه وتدفع هيا التمن 
smile emoticon


طب سنتين كتير أوي ليه الوقت ده كله ؟

أولا : انا سن بنتي هو اللي سمحلي اني ازود الفتره لانها 3 سنوات حاليا

 فمش هاقرر هدخلها مدرسه والا لأ قبل ما تكمل 5 سنوات ان شاء الله

ثانيا : اول سنه عزيمتي هتبقا فيها قويه وهتبقا نتائجها مفيده ومكثفه

 لكن انا محتاجه تاني سنه عشان اعرف هل هاقدر اكمل والا هاتعب من اول سنه 

واقيس التطور بين السنه الأولى والتانيه واشوف انا وهيا وصلنا لإيه

الموضوع مش كلمه بنرتاح بيها من نظام التعليم المدرسي


ومناهج الوزاره مش وحشه بالكامل 

بالعكس دي محطوطه على ايدي متخصصين 

لكن فيها حاجات عقيمه هتحتاج تنقيح


تقدري تخليها كمثال ليكي الطفل المفروض يتعلم ايه امتا مع زيادة ما تريدين زيادته 

لطفلك او نقصانه على حسب أهدافك من تعليمه ونوع التعليم

طيب التعليم العربي والا الانجليزي الناشيونال والا انترناشيونال أحسن ؟

مفيش حاجه اسمها كده ..

في حاجه اسمها انتي قدراتك انتي وطفلك ايه

 وايه الاحسن لطفلك مش الأحسن من وجهة نظر المجتمع

لازم ندرس كل حاجه لان ده قرار هيتبني عليه مستقبل طفل

 وهنتحاسب على القرار المصيري ده

ولازم نكون مؤهلين لأن مش كل الأمهات مؤهله انها تعلم تعليم منزلي

 وممكن أكون انا نفسي مش مؤهله لكده

فمش عاوزه ابقا سبب في ظلم بنتي .. ربنا يعينا ويتقبل منا


جاوبي على نفسك بمنتهى الصراحة عشان لما تحطي رجلك في خطوه تبقي عارفه 

على الأرقل انتي رايحه على فين 



لا تنسوني من صالح دعائكم 

سلام الله عليكم 



0 التعليقات: