Images

عن الضرب أتحدث!!

بتضربي ولادك عشان مجننينك ؟ 

مش قادره تمسكي نفسك ومش عارفه تتحكمي في أعصابك

وبتفكري جديا ان الحل هو الضرب ؟ 

وسائل الاقناع مش جايبه نتيجه سريعه وانتي تعبتي ؟ 

طيب اعرفي ازاي تحلى الموضوع ده

مع المستشاره الأسريه دعاء صفوت نقلا عن صفحتها حياتنا وولادنا 

تقول أستاذه دعاء : 

من ساعة ما فتحت موضوع الاستشارات التربوية في فتكات

لقيت كم هائل هائل بمعنى هائل من الأمهات بتعتمد اسلوب الضرب

كأسلوب تأديبي..

و المذهل اني باتكلم عن اطفال سنتين و ثلاث سنوات

لا و والله اطفال سنة و شهور

عشان كدا كتبت الموضوع دا و نشرته في المنتدى


وحبيت اشارككم فيه..

ولله الحمد والفضل والمنة خلال شهر اهو تقريبا اصبح عندي اكثر من 60 أم 

بيجاهدو و بيجتهدو انهم ما يمدوش ايدهم على اطفاله


.
كتير منهم مش بيعترف على العام.. و بيجي على الخاص ويقولي قد ايه هم ندمانين

بس مش قادرين و حبة بحبة بيتم تجاوز الضرب..

اكثر من خمسين في المية منهم بطل صراخ وزعيق
ارجوكم انشروا البوست في كل حتة فيها امهات..

لعل قلب ام يرق وتتوقف عن الضرب..

صباحكم سعادة..


ابني عنده مشكلة، عنيد زنان ما بيسمعش الكلام

بصي هو انا ام طيبة، بس بقى مشكلتي اني عصبية

وهو بيستفزني، فابضطر اضربه، اصله هو صعب اوي

انا باضربه بس والله بازعل اوي لما اضرب

انا باضربه بس باروح اخده في حضني و افهمه انا ضربته ليه

اعمل ايه ربنا يهديني بقى و احاول ابطل اضربه

الضرب ما بقاش يحوأ فيه ولا يجيب نتيجة

هو عنيد

هو مستفز

هو بيزن

هو ملتصق بيا اوي

هو مش بيسمع الكلام خالص

هو شيطان

عفريت

شقي

الجمل دي هي اكثر جمل انتشارا في كل الاستشارات التربوية،

واسمحو لي ، هي الجمل الأكثر غباءً على الاطلاق

وعذر واهي غير مقبول ابدا

انتي ام و كبيرة و عاقلة و راشدة و مكتملة النمو النفسي و العصبي

يعني ايه مش عارفة ما تضربيش ابنك؟

يعني ايه مش عارفة تمسكي اعصابك؟

يعني ايه يا حرام بتزعلي بعد ما تضربيه؟

خليني اقولك حاجة انتي بتضربي عشان انتي ضعيفة قليلة حيلة، ما بتعرفيش تربي،

ولما تتزنقي وخلاص بقى بتروحي ضاربه

بتتحامي في انك اكبر منه و اقوى منه

بتتحامي في انك عندك سلطة الضرب

خليني اقولك كام حاجة كدا

ابنك عنيد زنان ملتصق بيكي مش بيسمع الكلام، دا عشان حضرتك بتضربيه

و ما تقوليليش العكس يعني انتي مش بتضربيه عشان هو عنيد

او حتى لو هو عنيد قيراط تو ما بدأتي ضرب بيكون عنيد سبعمية وعشرين فدان

لو هو بيزن بنسبة عشرة في المية تو ما ضربتيه بيزن بنسبة مية في المية
.
ابنك بيتعلم العنف منك و بيتعلم ان مقبول نضرب الاخرين منك و بيتعلم ان فرض

السلطة للاقوى لانك لما بتغلبي معاه بتضربي

ابنك ممكن يبقى عدواني جدا او منطوي جدا

بتضربيه عشان خايفة على مستقبله، حضرتك بتدمري مستقبله

و ما حدش يقولي ما احنا انضربنا بس لا اتعقدنا ولا حاجة و كويسين اهو

لو انتي كويسة وسوية نفسيا كان زمانك بتتحكمي في اعصابك

كونك بتضربي اساسا دا ضعف بسبب ترسبات نفسية عندك

و من الناحية التانية

تخيلي كدا لو انتي بعد كام سنة بقيتي كبيرة في السن

و ابنك هو اللي المفروض ياخد 

باله منك و بعدين نرفزتيه و ضربك، مع انه بيحبك 

وبيزعل لما بيفقد اعصابه و بيضربك،

بس يعمل ايه مهو نبهك على الحاجة اكثر من مرة و انتي ما سمعتيش الكلام !

تقبليها، تقدري تتحمليها، 

هاتقوليلي لااا دا هو ما يضربنيش عشان بقى دا يبقى عقوق والدين

طب هو مش في حقوق لابناءنا علينا، و عدم تأدية هذه الحقوق عقوق بالأبناء،

ولا هو انتي ليكي انك ام و الجنة تحت اقدامك و خلاص؟

هاتقوليلي الضرب مباح شرعا و بنضرب ابناءنا على الصلاة، 

دا بالضبط زي (يا ايها الذين امنوا لا تقربوا الصلاة)

وما نكملش الآية (و أنتم سكارى)

يعني الضرب مباح بس في ايه في الصلاة عماد الدين

و ثاني ركن من اركان الاسلام ولها ما لها من أهمية

لا مش بس كدا دا الضرب بعد كام مرة نعلم الطفل فيها ،

بعد تلات سنين، غلط تتحسب كدا بعد ما نعلم الطفل

5 مرات في اليوم × 365 يوم في السنة × 3 سنوات = 5475 مرة

يعني عشان نضرب على الصلاة اولا بعد سن عشر سنوات

وحطولي تحت عشر سنوات دي الف خط 

و بعد ما نكون قولنا للولد صلي بالطيب واللين والتحبيب

و الترغيب و التهذيب و كل حاجة حلوة 

كام مرة، خمسة الاف و اربعمئة و وخمسة و سبعين مرة يا سادة يا كرام

تتخيلوا بهذا الشرط ممكن نضرب؟ هي دي تكملة الآية 

طيب و انتي بقى ايه، بتقولي للطفل (اللي عادة بيكون اقل من ست سنوات اصلا) 

على الحاجة مرة و اتنين و تلاتة

واعصابك بتفلت يا حرام و بتضربيه ،

بس ايه لا بردو خلينا حقانيين انتي بتندمي بعد ما بتضربيه و بتزعلي عليه 

كتر خيرك و عداكي العيب

تخيلي لو جوزك ربنا يخليهولك بيحبك اوي، بس عصبي و خلقه ضيق

و كل يوم والتاني يرنك العلقة المحترمة، ويندم ويزعل

هاتقبليها على كرامتك، غالبا لا،

و يمكن الناس تقولك لا طالما عادها مرة و اتنين يبقى دا مش بني ادم وبيضرب

 و ما عندوش احترام ولا ادمية ودي مش رجولة و انتي لازم تطلبي الطلاق

او تدخلي حد كبير يوقفه عند حده

و انتي او ابو الطفل لو بتضربوه مين يوقفكم عند حدكم بالله عليه؟

يطلب منكم الطفل الطلاق ازاي عشان تسيبوه يعيش طفولته و آدميته

تخيلي لو عندك مربية و ضربت ابنك، مش بتتشالي و تتحطي و لااا ابني ما 

يتضربش، يعني انتي بس اللي تضربيه

قفي مع نفسك وقفة صادقة بالله عليكي،

الضرب اهانة للكرامة، 

الضرب بقول للطفل انا باكرهك و مش باحبك، و مهما قولتيلي انك بتحني

وتعطفي بعدها مستحيل تمحي الشعور دا من قلب الطفل

الضرب و الندم و الدلع بعده بيقول للطفل انك ضعيفة الشخصية و من السهل 

الضغط على اعصابك و استفزازك لتلبية احتياجاته

الضرب بيعلم الطفل قسوة القلب

الضرب بيعلم الكذب لتفادي الضرب

الضرب بيخلق انسان مشوه نفسيا


ووالله دي مش مبالغات

انتو لو تشوفو كم الاستشارات اللي بنوصل في نهايتها ان المشكلة عند الام او الاب 

لانهم تعرضوا للعنف و هم صغيرين مش هاتصدقو
.
الكائن الصغير الضعيف دا هايكبر في يوم من الايام و هايجي في فترة مراهقة لا 

هاتبقي عارفة تصاحبيه ولا تعرفي مين صحابه ولا توجهيه ولا تنصحيه ولا تفيديه 

في اي حاجة

في فترة المراهقة هايعلي صوته عليكي و هاتضربيه و في مرة هايمسك ايدك 

ويوقفك عند حدك و يقولك انا ما بقتش صغير و اقدر ادافع عن نفسي

دا انتي لو مربية حيوان اليف في البيت هاتستحرمي تضربيه والله!!

و هاتقولي الرفق بالحيوان



طب و بالنسبة للنعمة اللي ربنا انعم بيها عليكي، هو مش ملكك، دا أمانة من ربنا

ومعلش خليني قاسية و اقولك، حياتك هاتبقى افضل لو ربنا استرد امانته منك؟ 

هاتكوني هادية و سعيدة؟


طب بتخلفي ليه؟ عشان اتجوزتي ؟ و المفروض بعد الجواز خلفة؟

 او عشان الناس هاتقول ايه؟

طب خلفتي لهذا السبب، ايه ذنب ابنك او بنتك؟

خلفتي عشان بتحبي الاطفال ونفسك يبقى عندك طفل

طيب اهو ربنا اكرمك، مش تصوني النعمة؟


استحلفك بالله، عشان خاطر نفسك في الاول،

وعشان خاطر الطفل اللي مالوش ذنب،

ووالله الاطفال مش شياطين ولا بيتعمدو يأذوكي

دول بيحبو امهم بس مش بيعرفوا يعبروا

واول ما بيحسو ان الام مش بتحبهم او انهم مش في امان بيلزقوا ويزنو و يعندوا


دي الطريقة اللي بيقولوا بيها احنا في حاجة نقصانا

في حاجة محتاجينها

افهمينا بشكل افضل
.
افتكري اول مرة لمستي ابنك او بنتك

افتكري اول مرة ابتسم

افتكري اول مرة حضنتيه

افتكري اول مرة قال ماما

كنتي مخططة و انتي بتحضنيه بكل الحنان انك هاتكوني ام اشكيفة مش بتعرف 

تتحكم في اعصابها و بتضرب؟

كنتي مقررة انك هاتفضلي ام جاهلة مش هاتقرا في التربية

و تتعلم ازاي تتعامل مع النعمة دي

دا انتي لو حد جابلك موبايل غالي هدية،

 بتروحي تقري عنه وتفضلي تحاولي تفهمي عشان تحافظي عليه


طب و ابنك؟ مش غالي
من انهاردة عايزة قرار من كل واحدة بتضرب ابنها ان التصرف دا هايتوقف حالا،

 و انك حتى لو مضغوطة هاتحاولي تشوفي ايه الي ضاغطك و تتصرفي فيه

عايزة كل ام بتضرب ابنها و تقرر قدام نفسها ان دا هايتوقف انهاردة

دلوقت

وانها هاتحضن ولادها بحب يستحقوه

وهاتتعلم معانا ازاي في وسائل تأديب وتهذيب اخرى

الموضوع مش هزار و مافيش فيه تهاون

القرار ليكي

عايزة ايه لابنك ولنفسك اتمنى تكوني عارفة
في امان الله

دعاء صفوت